Құрметті тапсырыс берушілер!

«Қазақстан Республикасының кейбір заңнамалық актілеріне Мемлекет басшысының жекелеген тапсырмаларын іске асыру мәселелері бойынша өзгерістер мен толықтырулар енгізу туралы» 2022 жылғы 30 желтоқсандағы Заңға сәйкес кейбір заңнамалық актілерге Мемлекет басшысының жекелеген тапсырмаларын іске асыру мәселелері бойынша өзгерістер мен толықтырулар енгізілді, оның шеңберінде Білім беру инфрақұрылымын қолдау қорын (бұдан әрі - Қор) құру көзделген.

Қабылданған түзетулерді іске асыру үшін Оқу-ағарту министрлігінің 2023 жылғы 17 ақпандағы № 38 бұйрығымен Білім беру инфрақұрылымын қолдау қорының қаражатын бөлу, жұмсау, мониторингілеу және есептілік қағидалары (бұдан әрі – Қағидалар) бекітілді.

Бұл қаражат орта білім берудің басталған объектілерінің құрылысын аяқтау, сондай-ақ орта білім берудің жаңа объектілерін салу және (немесе) реконструкциялау (жапсарлас құрылыс салу) үшін көзделген.

Осыған байланысты, 2023 жылғы 24 мамырдан бастап тапсырыс берушілер үшін веб-порталда облыстардың, республикалық маңызы бар қалалардың және астананың Құрылыс басқармалары (тізімге сәйкес) атынан техникалық мүмкіндік іске асырылды:

- Қор қаражаты есебінен орта білім беру объектілерін салуға және (немесе) реконструкциялауға (жапсарлас құрылыс салуға) мемлекеттік сатып алу туралы шарттар жасасу. Бұл ретте жоғарыда көрсетілген қаржыландыру көзі шеңберінде жасалған шарттар қазынашылық органдарында тіркелуге жатпайды;

қаржыландыру көзінің өзгеруіне байланысты – «Білім беру инфрақұрылымын қолдау қорының қаражаты есебінен» бұрын жасалған мемлекеттік сатып алу туралы шартқа қосымша келісім жасасу.

Осы қосымша келісім «Қазынашылық органдарында тіркеусіз» белгісімен жасалады.

Бұл ретте, Қазынашылық органдарында бұрын жасалған шарттар шеңберінде бюджет қаражаты бойынша міндеттемелерді аяқтау (тіркеу туралы тапсырыстардың (хабарламалардың) күшін жою) қаржыландыру көзін өзгерту туралы қосымша келісімді қоса бере отырып, «Қазынашылық-Клиент» АЖ-ға өтінімдерді жіберу арқылы веб-портал жүйесінен тыс жүзеге асырылатын болады.

Қаржыландыру көзін өзгерту туралы қосымша келісім жасалғанға дейін тапсырыс берушілер төлемдер сомасын және қабылданған міндеттемелер сомасын дұрыс бөлуі қажет (бекітілген актілер сомасы бөлінген төлемдер сомасына тең болуы тиіс).

Кейіннен Қор қаражаты есебінен жүргізілген төлемдер туралы мәліметті тапсырыс берушілер қолмен қосатын болады.